Hiavaka ny fanombohan’ny ligin’Analamanga, taranja tsipy kanetibe, ny taom-pilalaovana. Hanome sehatra ireo mpilalao eny anivon’ny fokotany izy ireo ka hifampitana amin’ireo efa sangany. Hampakatra ny lentan’ny fifaninanana no tanjona.
Hotanterahina eny amin’ ny kianja Ivato, ny sabotsy 16 sy ny alahady 17 marsa ho avy izao, ny fifaninanana Petanky Be Analamanga, karakarain’ny ligy. Hafa mihitsy izany satria fifaninanana hifanandrinan’ny fokontany eto an-drenivohitra ary natao ho an’olon-telo miaraka, na lehilahy na vehivavy na miaraka “mixte”.
Araka ny fanazavana nomen’ny mpikarakara, misokatra ho an’ny rehetra lahy sy vavy na manana kara-pilalaovana na tsia, ny fihaonana saingy tsy maintsy miray fokontany ny mpilalao. Tsy maintsy mitondra fanamarinam-ponenana sy sary tapaka izy ireo hahalalana fa mipetraka amin’ny fokontany iray ny ekipa.
Mizara roa ny fifaninanana amin’ity Petanky Be Analamanga ity. Mifaninana ao amin’ ny vondrona “A” avokoa aloha izay rehetra nisoratra anarana. Tsy avy hatrany dia mody akory ireo izay mihintsana ao amin’ity vondrona ity, fa midina ao amin’ny “B” indray. Hanomezana sehatra hilalaovana mihitsy no tanjon’ny ligin’Analamanga amin’ity. Maro mantsy ireo mpilalao, na vavy na lahy, hita eny anelakela-trano sy amin’ny toerana samihafa ireny, izay manana ny fahaiza-manao saingy tsy miditra anaty klioba. Ny hanehoan’izy ireo ny fahaizany sy hitarihana azy ireny ho ao anaty fifaninanana ara-dalàna no tena imasoana amin’izao Petanky Be Analamanga izao. Ankoatra izay, mba hiverenan’ireo antsoina hoe “patron” hiakatra kianja ihany koa izay nampiroborobo fatratra ny fifaninanana fahiny.
Hahazo loka goavana, toy ny môtô scooter 3 sy solo-saina ary amboara ho an’ireo fokontany voalohany ao amin’ ny vondrona “A” raha fahitalavitra miloko kosa ny an’ny “B”. Hifarana ny zoma 15 marsa ny fisoratana anarana, mialoha ny hanatontosana ny antsapaka.
Tompondaka
French