Olona fito indray naratra. Io ny vokatry ny lozam-piarakodia nitranga tao Tsarasaotra Ambositra, omaly. Taksiborosy Sprinter iray avy any Fianarantsoa hiakatra aty Antananarivo no tra-doza tampoka. Vokatry ny fandehanana mafy ka tsy voafehin’ny mpamily intsony ny fiara no voalaza fa antony nahatonga ny loza. Tsy nisy ny aina nafoy. Nentina hopitaly avy hatrany ireo maratra.
Naiditra am-ponja vonjimaika, afakomaly, ilay lehilahy nandrahona ny ray aman-dreniny tamin’ny sabatra teny Anganomasina Soanavela, kaominina Ambohijanaka. Nanakorontana ireo ray aman-dreniny isaky ny mamon-drongony izy. Voatery niantso zandary izy ireo. Nahitana rongony tao an’efitranony tamin’ny fotoana nahatongavan’ny zandary nisambotra azy. Tsy tompon’ny tenany intsony ity farany tamin’io fotoana io.
Fiara P.305 iray kila forehitra teny Andravoahangy, omaly atoandro. Tsy fantatra izay nahazo ity fiara ity fa nirehitra tampoka ka nampisahotaka ny mponina teny amin’ny manodidina. Ny afo efa nirehitra no hitan’ny olona. Haingana ny firehitr’ilay fiara, saingy tonga ara-potoana ihany ny teo anivon’ny mpamonjy voina. Niitatra tamin’ilay tranombarotra anefa ny afo, saingy voafehin’ny mpamonjy voina izany.
French