« Sarotra ny mitsara ny zavakanto », hoy ny fomba fitenin-dry zareo tandrefana. Ho an’ny firenena tatsinanana, tsy mitombina io. Rehefa manitsaka na mandika na manimba ny soatoaviny, tsy ankatoaviny ho zavakanto velively. Ho an’ny hira manokana, tafiditra lalina amin’ny fampiasana ireo teknolojia vaovao ihany koa ny Malagasy. Tsy voatana intsony ilay fananana fototra (feo, tonony, votoatiny) matanjaka fa nosaronan’ny zavamaneno sy ny pitsopitsony isan-karazany. Saika miantehitra amin’ny fampiasana ireny zavamaneno mahatafavoaka feo maro ireny ny mpihira na mpitendry na ny mpandrindra, hany ka very ilay « fanahy » ao anatin’ny hira iray. Tratry ny « bekorontana » !
Antony iray mampidina tsikelikely ny fitaizana azo avy amin’ny fihainoana hira malagasy io tranga io. Hamaivanin’ny « bekorontana » ilay fanahy famoronana, satria, voabaikony avokoa na ny mpamorona ny feony sy ny tonony, ny mpitendry, na ny mpandrindra.
Vokany, tsy mateza, tsy mahatety vanim-potoana ny ankamaroan’ny hira noforonina nanomboka ny taona 1990!
HaRy Razafindrakoto
French