Mandeha ny asa fanamboarana ny arabe migodana « autoroute », ampahany Antananarivo-Anjozorobe. Efa tsinjo ny soritra amin’ny ampahany faharoa, Anjozorobe-Toamasina.
Mahatratra 30 km ny lalana vita ravona amin’ny ampahany voalohany, amin’ny arabe migodana « autoroute », miainga eto Antananarivo mankany Anjozorobe mirefy 80 km. Nidina teny an-toerana ny minisitry ny Asa Vaventy Rafidison Richard Théodore, ny herinandro lasa teo, nahita maso ny asa ataon’ny orinasa Samcrete. Voalaza fa efa hoenjehina hatao godirao ny 25 km amin’io 80 km io mialoha ny faran’ity taona 2024 ity. Efa mandeha ny famakiana sy ny fitotoana vato sy fasika. Efa tafapetraka koa ny laboratoara hanaovana fanadihadiana ny lafiny toe-tany jeoteknika.
Nilaza ny minisitra Rafidison Richard, fa tsy maintsy atao laharam-pahamehana ny fanaraha-maso. Mahavelombolo ny fizotry ny asa. Ho tratra ny daty sy ny fe-potoana nifanarahana hahavitany. Hisolo ny lalam-pirenena faharoa (RN 2) afaka taona vitsy izy ity. Tsy atao an-tsirambina ny zava-drehetra. anatin’izany ny fanajana ny tontolo iainana.
Nomarihin’ny minisitra ihany koa fa efa hita soritra ny ampahan’ny lalana manaraka ny Anjozorobe-Toamasina. Miainga eo Anjozorobe hatrany Andaingo, ary ny ampahany eo Andaingo mipaka any Toamasina. Tsy maintsy mbola misy ny fanadihadiana lalina mahakasika ny fiantraikan’ny asa amin’ny tontolo iainana (EIE).
Tsy mandalo faritra arovana
Mirefy 260 km ny refin’ity « autoroute » hatao ity. Tsy mbola nisy ny fanovana izany halavany izany hatreto. Efa novaina ny soritry ny lalana amin’ny ampahany voalohany Antananarivo-Anjozorobe, satria be loatra ny tanimbary sy lohasaha nototofana ary nohajaina koa ny vakoka ara-kolontsaina, toy ny Ala sy ny Rovan’Ambohimanga.
Naneho hevitra koa ny fikambanana iraisam-pirenena sy eto an-toerana mpiaro ny tontolo iainana fa tsy tokony handalo ny atin’ny faritra arovana Ankeniheny-Zahamena ity arabe ity.
Njaka Andriantefiarinesy
French