Natao ny sabotsy 10 desambra teo tetsy amin’ny lapan’ny tanàna Analakely, ny fanamarihana ny fankalazana ny « Andro iraisam-pirerenena amin’ny ady amin’ny kolikoly ». Lohahevitra novoizina tamin’izany ny : « Aiza ny ady amin’ny fitantanana ny tanànantsika ? ». Nitarika ny famelambelaran-kevitra tamin’izany ny ben’ny Tanànan’ Antananarivo Renivohitra, Andriantsitohaina Naina sy ny talen’ny Fitantanana tsara tantana sy ny ady amin’ny kolikoly. Teo koa ny filohan’ny vaomiera ny fitantanana tsara tantana sy ny ady amin’ny kolikoly avy ao amin’ ny mpanolotsaina. Nisongadina tamin’ izany ny fanolorana ny asa vitan’ny CUA momba ny ady amin’ny kolikoly eo amin’ ny fitantanana ny tanàna. Anisan’ny famerenana ny fitokisana eo amin’ny kaominina sy ny vahoaka izany. Eo koa ny fametrahana ny Sampandraharaha miandraikitra ny ady amin’ny kolikoly sy tsara tantana ary koa ny vaomiera miady amin’ny kolikoly sy ny fitantanana mangarahara. Manara-maso ny mpanatanteraka izany.
Fampidirana mpiasa, anaty mangarahara
Navoitra koa ny fifanaraham-piarahamiasa teo amin’ny Bianco sy ny CUA, maneho ny fahavononan’ny ben’ny Tanàna hiady amin’ny kolikoly. Eo koa ny ezaka fampiofanana ny tomponandraikitry ny kaominina, niarahana tamin’ny Bianco ary ny fanaovana ny mason-tsivana sy ny fanaraha-maso ny fampidirana mpiasa, anaty mangarahara. Anisan’izany ny fampidirana polisy sy ny sampana mpamonjy voina.
Etsy andaniny, nitondra soso-kevitra koa ireo fikambanana, hanatsarana ny fitantanana ny tanàna. Nanterin’ny mpitantana fa efa anisan’ny ady amin’ny kolikoly ny fametrahana ny “Digitalisation”. Natsidiny fa tsy maintsy hapetraka mandritra ny enim-bolana ho avy ny fizarana karatra nomerika. “Anisan’ ny fototry ny fampandrosoana ny ady amin’ny kolikoly sy ny fitantanana mangarahara. Mila mametraka politika maharitra amin’izany isika”, hoy ny Ben’ny tanàna. Nambarany ihany koa fa misy ny fanapahan-kevitra tsy mahafaly ny rehetra. Fantatra anefa fa mahasoa ny ankamaroan’ny mponina izany ka tsy maintsy miditra amin’izany ny CUA. Tsy hipetraka ny fototra raha tsy izany, araka ny nambarany.
Synèse R.