Tanterahina etsy amin’ny Novotel Alarobia, nanomboka omaly hatramin’ny zoma izao, ny atrikasa momba ny fandaharanasa maharitra ho an’ny indostria eto Madagasikara (Journées de programmation industrielle). Dinihina mandritra izany ny tondrozotra mazava hampiroboroboana ny indostria eto amintsika. Ao koa ny dinika niarahan’ny fanjakana sy ny sehatra tsy miankina na ny “dialogue public privé” (DPP), herintaona lasa izay. Fantatra fa lany sy nankatoavin’ny solombavambahoaka ny lalàna momba ny fampiasam-bola. Raha mbola miandry fankatoavana ny eo anivon’ny Antenimierandoholona izany. Dingana efa nandrasan’ny mpampiasa vola rahateo ny hanavaozana ny lalàna momba ny fampiasam-bola eto Madagasikara. Maro, araka izany, ny teboka ahafahana manatanteraka ny fanavaozana ity lalàna ity. Ao ny fampitovian-jo ho an’ireo mpampiasa vola vahiny sy malagasy. Eo koa ny fanamorana ny fanampiana an’ireo indostria sy ny fampiroboroboana izany. Fanamby napetraky ny fanjakana rahateo ny fananganana indostria isam-paritra.
Fiaraha-miasa maharitra
Hanampy amin’ny fanatanterahana izany koa ny fanohizana ny fiaraha-miasa amin’ireo mpampiasa vola efa naira-niasa tamin’i Madagasikara. “Tsy maintsy atao laharam-pahamehana ny fanohizany fiaraha-miasa amin’ireo mpandraharaha mivondrona eo amin’ny sehatry ny indositria mba hahafahan’izy ireo mampivelatra sy manome asa ho an’ny tanora”, hoy ny minisitry ny Fampiroboroboana ny indostria sy ny varotra ary ny fanjifana, Razafindravahy Edgard. Notsindriany tamin’izay fa handraisana fepetra kosa ireo orinasa miankina na tsy miankina amin’ny fanjakana tsy manara-dalàna. Maro, hoy izy, ny ezaka ataon’ny minisitera amin’ny fanohanana sy fanampiana ireo mpandraharaha malagasy.
Henintsoa H.
French