Mitohy ny fanentanana amin’izao fiatrehana ny fetim-pirenena izao. Niantso firaisankina ny minisitry ny Raharaham-bahiny, Yvette Sylla sy ny minisitry ny Fiarovam-pirenena, ny Jly Rakotoarijaona Josoa.
“Manentana antsika Malagasy mba hampiseho firaisankina sy fitiavan-tanindrazana. Iray ihany ny tanindrazantsika. Noho izany, tokony hiara-misalahy isika hanompo ny tanindrazana : tsy hijery izay mampisaraka fa izay mampiombona”. Io ny hafatry ny minisitry ny Raharaham-bahiny, i Sylla Yvette, omaly. Nanararaotra ny fananganan-tsaina teny anivon’ny minisitera izy, izay tafiditra ao anatin’ny hetsika fankalazana ny faha-63 taona niverenan’ny Fahaleovantena.
Narahina firedonana ny hiram-pirenena izany, niarahana tamin’ny mpitsoka mozikan’ny Tafika malagasy. “Ao anatin’ny minisiteran’ny fiandrianam-pirenena ny minisiteran’ny Raharaham-bahiny. Noho izany, rariny sy hitsiny raha natao teto ny lanonana fananganan-tsaina”, hoy izy.
Fanehoana fitiavan-tanindrazana
“Ato amin’ny minisiteran’ny Raharaham-bahiny no misokatra ny varavaran’i Madagasikara amin’ny alalan’ireo ambasady rehetra izay masoivoho mijery antsika avy any ivelany sy ijerentsika ny any ivelany ihany koa”, hoy kosa ny minisitry ny Fiarovam-pirenena, ny jeneraly Rakotoarijaona Josoa. Fanentanana ny rehetra no atao mba hahatsiaro tena amin’izay fitiavan-tanindrazana izay. Tsy manana tanindrazana afa-tsy i Madagasikara isika Malagasy. Ny olona any ivelany aza tia an’i Madagasikara. Isika indray ve no tsy ho tia azy? Na inona na inona sehatra misy ny tena, tanindrazana iombonana i Madagasikara. Tsy tokony holokolokoina ny fitiavan-tanindrazana, fa an’ny Malagasy rehetra i Madagasikara.
R. Nd.
French