Voasambotry ny zandary ny lehilahy sy vehivavy iray nivarotra volamena sandoka tao Ambohibao, ny faran’ny herinandro teo. Mody manantona olona sendra azy, milaza ho manana vovo-bolamena ny lehilahy iray. Efa hisy handray io entana io saingy vazaha any Nosy-Be ka tsy mahay miteny frantsay ilay mitonona ho mpivarotra. Reseny lahatra, araka izany, ny olon-tsotra sendra azy mba hiresaka amin’ilay vazaha an-telefaonina. Ity farany izay mody manaiky ary handefa olona hanamarina ny kalitao. Misy olon-kafa tonga mijery ka milaza fa tena tsara tokoa ilay volamena. Nilaza hitady mpividy hafa ankoatran’ilay vazaha naniraka azy anefa io olona io. Mangataka vodiondrim-barotra amin’izay ny tompon’ny volamena sandoka ka hangalany vola eo ilay olon-tsotra raha toa ka efa mpiray tambazotra aminy ilay voalaza ho mpijery kalitaon’ny volamena. Tsy hita intsony ireo mpisoloky aorian’ny fahazoany ny vola.
Naharay fitarainana momba io tranga io ny zandary. Niafara tamin’ny fahatratrana ireto olona roa ireto izany.
Tsiferana R.
French