TSELATRA

Taksiborosy iray mampitohy an’i Toliara amin’ Antananarivo tra-doza teo Andohanilakaka, omaly tolakandro tamin’ny 2 ora. Avy nisakafo atoandro, niala lavaka ny mpamily araka ny fanazavan’ny iray amin’ireo mpandeha. Nivadika ny fiara ka mpandeha iray naratra. Tsy nisy aina nafoy.
Trano miisa sivy tafo nilatsaham-potaka tao Ambatomarina, fokontany Lavatrafo, kaominina Anjo­ma Itsara, disitrikan’Isandra, afakomaly. Tsy nisy orana, nirefotra tampoka ny varatra. 49 ireo tsy manan-kialofana vokatr’io loza io.
Roa lahy nitaingina kodiarandroa tra-doza teny Ambohibao, afakomaly alina. Nifatratra tamin’ny tamboho rehefa tsy nahafehy ny familiana ka tapa-tongotra ny iray. Voa mafy ny iray. Efa naharenesana fofona alikaola avokoa izy mirahalahy.
Naiditra am-ponja vonjimaika ilay raikely nanolana zazavavy vao 6 taona tao Mahatsara-Avaratra, Farafangana, ny 23 oktobra teo. Nanararaotra io lehilahy io rehefa tsy tao an-trano ny renin’ilay zaza. Simba tanteraka ilay zazavavy ka nisy ny fitoriana. Niafara tamin’ny fisamborana ilay nahavanon-doza izany.