Polisy nilatsaham-potaka : niara-maty ilay ankizilahy 9 taona sy ny reniny

Maty tsy tra-drano vokatry ny ratra mafy nahazo azy ny renim-pianakaviana iray sy ny zanany lahy tao Manakambahiny Ambatondrazaka, afakomaly.

Andro niditra ! Niharan-doza tampoka ny raim-pianakaviana iray izay polisy sy ny vady aman-janany, ny harivan’ny alatsinainy 18 desambra teo. Nitondra mo­to, nihazo an’Amparafara­vola izy telo mianaka ireo, haka ny karaman-drangahy. Tsy nanampo na inona na inona, araka izany, ireto fianakaviana ireto. Nitodi-doha hihazo ny trano fonenany, niseho tampoka ny atambo. Poa toy izay, nirefotra tampoka ny varatra. Tsy nahatsiaro tena ilay polisy namily. Nipitika teny ambony moto ilay vadiny sy ny zanany lahy 9 taona. “Niala ny aroloha an’io vadina polisy io ka voa mafy tao amin’ny faritry ny lamosiny izy”, hoy ny loharanom-baovao avy amin’ny kaomisarian’ny polisy ao Amparafaravola. Tetsy ankilany, naratra mafy teo amin’ny faritry ny lohany koa ilay zazalahy 9 taona taorian’ny fianjerana.

Nentina hopitaly
Nentin’ireo nanatri-maso tamin’ny alalan’ny Kubota, namonjy ny hopitaly ao Manakambahiny avy hatrany ireo telo mianaka niharan-doza ireo. Nanao izay ho afany ny mpitsabo tao an-toerana saingy tsy tana ny ain’ilay ramatoa sy ny zanany lahy. Nahitana fahamaizana tamin’ny entana nentin’izy telo mianaka teny ambony moto, araka ny fanadihadian’ny mpitandro filaminana misahana ny raharaha. “Tsy misy banky BFV ao Amparafaravola ka voatery mihazo an’Ambaton­dra­zaka izy telo mianaka”, hoy ny polisy. Anisan’ny mpikambana mavitrika ao anatin’ny fikambanan’ny vadina polisy “Fivapova” io renim-pianakaviana namoy ny ainy io.

Tsiferana R.