Saron’ny zandary misahana ny fifamoivoizana Antsirabe tao Andranomanelatra, omaly, ireo rongony 50 kitapo, milanja 488 kg. Niainga avy any Ankily, Ihosy ireto entana ireo ka voasakan’ny zandary tao Mahandraza Andranomanelatra, Antsirabe II (RN7 PK 147). Nafangaro tamin’ny gony an-jatony misy eladrano (mica) ireto zava-mahadomelina 50 gony ireto. Notsindrina sy nafenina tsara tao ambanin’ireo gony misy eladrano. Efa nahazo loharanom-baovao mialoha anefa ny zandary momba ny fisian’ity kamiaobe mitondra rongony ity ka nandrasana fotsiny sisa ny nandalovany tao Antsirabe. Nogiazana am-balam-pamonjana ity kamiaobe ity sy ireo entana voarara nentiny. Notazonina hanaovana fanadihadiana koa ireo olona efatra tao anatiny niaraka tamin’ny mpamily. Tafaporitsaka tampoka anefa ny mpamilin’ilay kamiaobe, araka ny tatitra voaray avy amin’ny zandary. Mbola ifampitadiavana izy hatramin’izao. Nanamafy ny zandary fa zava-doza ny fiparitahan’ny zava-mahadomelina toy izao eny anivon’ny fiarahamonina, satria manimba ireo tanora. Lasa miankindoha ka mitarika tsy fandriampahalemana eny anivon’ny fiarahamonina izany. Tsy maintsy ahitana zava-mahadomelina avokoa ny ankamaroan’ireo jiolahy tratra manao ny asa ratsiny, raha ny tatitra nampitain’ny zandary hatrany. Mangataka tolo-tanana ho fiaraha-mientana hamongorana ny fiparitahan’ny zava-mahadomelina ny zandarimaria.
J.C
French