Mpivarotra rongony roa vavy nosamborin’ny polisy teny Itaosy nandritra ny hetsika “Sarika”, ny faran’ny herinandro teo. Nanao be midina ny polisy ka sarona teo am-pikirakirana zava-mahadomelina izy roa ireo. Efa nataony anaty fonosana 42 ny rongony. Ankoatra io, nahatrarana rongony tao anaty harona miisa telo koa tao amin’izy mirahavavy ireo. Amidiny amin’ireo tanora eny amin’ny manodidina an’Itaosy ireo entana ireo. Nifanindry an-dalana tamin’io fidinan’ny polisim-pirenena ifotony io, nanentana manokana ireo tanora teny ifotony tsy hiroboka amin’ny zava-mahadomelina. Napetraka amin’ireo toerana hivezivezen’ny olona toy ny tranombarotra sy Cash point koa ny laharana ahazoana mivantana ny polisy. Nisampana tamin’ny fokontany am-polony teny Itaosy ny mpitandro filaminana nandritra ity hetsika ity.
Tsiferana R.
French