Naharitra adiny roa ora mahery ny famonoana ny afo nataon’ny mpamonjy voina tao amin’ny trano fonenan’ny mpianatra Cité Prefat N ao Andrainjato Fianarantsoa, afakomaly.
Niantomboka tamin’ny efitrano iray ny firehetana, tamin’ny 9 ora alina. Niitatra tao anatin’ny minitra vitsy monja tamin’ireo efitra nifanila taminy izany. Nikoropaka samy namoaka izay entana azony ireo mpianatra. Nanomboka niredareda ny afo ka nifanampy tamin’ny fifehezana ny afo ireo mponina ao an-toerana. Nigadona teny an-toerana rahateo ny sampana mpamonjy voina. Nananosarotra ny famonoana ny afo noho ny firehetan’ny vatan-trano maromaro. Voafehy ny afo tamin’ny 11 ora sy 10mn alina. Araka ny tatitry ny tomponandraikitra, efitra 12 rava tanteraka vokatry ny voina. Kila tanteraka ny 6 tamin’ireo rahatoa ka voatery noravaina hisorohana ny fiitaran’ny afo ny 6 hafa. Mahatratra 260 ireo mpianatra tra-boina. Kilan’ny afo avokoa ny fitaovam-pianarana sy lamba fitafin’ny ankamaroan’izy ireo na dia nisy aza afaka nanavotra ny azy. Ireto farany izay tsy afa-nanao na inona na inona intsony taorian’ny fiitaran’ny afo.
Mampiahiahy
Miroso amin’ny fanadihadiana momba ity tranga ity ny manampahefana ao an-toerana. “Vokatry ny ady niseho tao amin’ny olon-droa no niteraka ny firehetana. Ankilany, misy milaza ho fifampikasohan’ny herinaratra”, hoy ny fanazavan’ ny kaomandin’ny tobim-paritry ny zandarimaria ao Fianarantsoa. Efa misy ny anaran’olona voarain’izy ireo amin’izao fotoana. Ho fantarina ny mombamomba azy ireo ary hatao ny fanamarinana ny tena zava-nisy marina, araka ny fanazavana. Tsy voafaritra mazava ny fototry ny firehetana hatramin’ny fotoana nanoratana. Nidina ifotony naka am-bavany ireo mpianatra lasibatra ny mpitandro filaminana. Nitondra ny teny fankaherezana ho an’ireo lasibatra koa ny filohan’ny Oniversite ao an-toerana. Andrasana ny fanadihadian’ny mpitandro filaminana.
Tsiferana R.
French