Tratra ny kamiao iray mpanangona hazoala tsy ara-dalàna miisa 421, tany Ampitambe, kaominina Ambohibary, distrika Moramanga. Fitsirihana nataon’ny Sampandraharaha Ciref/CEF Moramanga no nahatrarana azy. Naiditra vonjimaika am-ponja ny tompon’ny hazo sy ny mpamily ilay kamiao ary nogiazana ny hazo sy ilay fiarabe.
Mitohy ny fanarenana ny lalana tena ratsy amin’ny lalam-pirenena faha-2 na avy aza ny orana. Anisan’izany ny eo Ambodisovoka (PK 291) sy Ranomafana (PK 204), izay samy efa vita ny fanarenana nataon’ny orinasa CRCC. Am-perinasa kosa izy ireo, ankehitriny, any Ampasamadinika (PK304).
Manodidina ny 4 000 Ar, izany hoe, 1 150 Ar ny kapoakan’ny vary makalioka sy vary gasy mena eto an-dRenivohitra. Mahatratra 2 800 Ar (800 Ar/kapoka) 3 150 Ar (900 Ar/kapoka) ny vary gasy tsotra (tsipala). Amidy 2 600 Ar (750 Ar/kapoka) ny vary avy any ivelany « stock », saingy tsy hita manerana ny mpaninjara.
Hankalazaina any Toliara, ny 28 febroary hatramin’ny 8 marsa ho avy izao, ny « Herinandron’ny Fizahantany maharitra sy ny tontolo iainana ». Handray anjara avokoa ny mpisehatra rehetra vonona hitandro ny tontolo iainana any atsimon’ny Nosy. Mikarakara ny hetsika ny Ofisim-paritry ny fizahantany Toliara (ORTU) sy ny fitantanam-paritra DRT.
French