Tratra teny amin’ny seranam-piaramanidina iraisam-pirenena Ivato Antananarivo, omaly, ny lehilahy teratany indianina iray nitondra vovo-bolamena milanja manodidina ny 1,6 kilao. Saika handray ny sidina ET lah-852 ho any Dubai ity mpandeha ity, saingy nampiahiahy ny sampandraharahan’ny Fadintseranana ny fihetsiny. Tamin’ny alalan’ny fitsirihana ny vatana, ny fitaovana « bodyscan » no nahitana fonosan-javatra miisa efatra tany amin’ny faritry ny fitombenany. Nentina tany amin’ny toeram-pivoahana avy hatrany ity lehilahy ity, nasaina namoaka ireo fonosana, ka voamarina fa vovo-bolamena tokoa rehefa nosokafana ny tao anatiny ka mitotaly 1,595 kilao. Notazonina avy hatrany ilay mpandeha ary mitohy ny fanadihadiana amin’ny antsipiriany.
Faninefany izany izao ny trafika volamena sarona teny Ivato. Tratra ny 30 janoary 2025 teo, ny teratany malagasy nitondra birikim-bolamena 1,780 kilao. Nafenin’ny mpiray tsikomba tany amin’ny toeram-pivoahana ny volamena, izay mbola karohina hatramin’izao.
Nisy koa ny birikim-bolamena 53,7 kilao tratra ny 26 desambra 2024 sy ny 13,5 kilao, tratra ny 11 desambra 2024.
Njaka A.
French