Toarian’ny fidinan’ny mpitandro filaminana hampandry fahalemana an’i Toamasina. Maty voatifitry ny mpitandro filaminana avy amin’ny UIR tao amin’ny depot fahatelo Toamasina i Dadabota na Dadabekibo, omaly tolakandro. Jiolahy malaza amin’ny fampiasam-bola toy ny mpandraharaha rehetra ary mampanofa basy ihany koa izy. Ankoatra izay, mampiasa tovolahy kely maro hanendaka sy hamono olona amin’ny alalan’ny fitaova-maranitra toy ny antsy, raha ny angom-baovao voaray. Nisy ny fanaraha-maso sy fikarohana nataon’ny mpitandro filaminana azy, tao anatin’ny fotoana maro. Tratra teo ampanomana fanafihana mpandraharaha iray tao Depot fahatelo izy tamin’io fotoana io. Raikitra ny fifanjevoana ary voatifitry ny polisy izy ka maty. Antony nanarahana azy ny fomba fampiasam-bolany tsy mazava amin’ny filazany fa mpandraharaha ny tenany. Teo koa ny fitarainana nataon’ny mponina maro mahakasika azy noho ny firongatry ny famonoana olona.
Marihina fa nisian’ny olona voatsindron’antsy, tranga indroa nisesy nanoloana ny trano fonenany. Tovolahy nandeha nihazakazaka maraina no niharan’ny tsindron’antsy voalohany. Faharoa ny renin’io tovolahy io ihany, izay niandry fiara hamonjy asa vao maraina no lasibatra. Tsy fantatra mazava ny olon-dratsy nanatanteraka ny asa ratsy tamin’izany. Mbola mitohy hatrany ny fikarohana ireo olon-dratsy sy famongorana ireo jiolahy rehetra any amin’ny faritr’i Toamasina.
Sajo/ Mino
French