Namela takaitra ilay andro ratsy nandalo tao avaratra, faritra dimy no voakasika, distrika valo sy kaominina 16 no nitondra takaitra. Hiverina hanambana ny faritra Menabe na Atsimo Andrefana kosa ilay rivodoza Jude aorian’ny fiverenany ao amin’ny lakandranon’i Mozambika, amin’ity herinandro ity.
Taorian’ny fandalovan’ilay andro ratsy tany amin’ny tapaxny avaratry ny Nosy, nandefa tatitra ny BNGRC, omaly maraina, fa tovovavy iray no namoy ny ainy nianjeran’ny hazo tao Toamasina II, iray koa ny olona naratra izay rain’ilay tovovavy maty ihany. Mahatratra 4 115 ny traboina tokantrano 1 092, 78 any Ambatosoa, 3 492 any Analanjirofo, 545 any Sava. 3 617 ny olona nafindra toerana (tokantrano 887) amin’izao fotoana izao amin’ny toeram-pandraisana sivy ho an’ny 3 470 ary eny anivon’ny fianakaviany kosa ho an’ny olona 147 (tokantrano 49). Misy olona 3 050 ao Maroantsetra amin’ny toeram-pandraisana fito.
420 ao Sambava amin’ny toeram-pandraisana roa. 76 ny isan’ny trano dibo-drano, 37 ny trano rava, roa ny tetezana tapaka, iray ao Ankofabe mampitohy renivohitry ny kaominina amin’ny fokontany Anjahamarina II. Tsy mbola azo hivezivezena koa ny passage à gué ao Manambery (distrikan’i Vohémar) noho ny fikaran’ny rano. Azo ampisaina kosa ny tetezana ao Manambery ho an’ny fiara lasaky ny 5t. Niakatra ny reniranon’i Mahavavy ka azo ampiasaina aloha ny tetezan’i Mahavavy. Noho ny fihotsahan’ny tany, nampiatoana koa ny fifamoivoizana amin’ny RNT 3B au PK 63+400 ka efa manala ny sakana ny tomponandraikitra. Rehefa midina ny haavon’ny rano vao azo ampiasaina indray ny tetezan’Ifasy.
Manambana any andrefana ilay rivodoza Jude
Nitombo hery ka lasa rivodoza, ny sabotsy alina, ary nomena ny anarana hoe Jude ilay andro ratsy ao amin’ny lakandranon’i Mozambika. Omaly maraina, tany amin’ny 250 km avaratra somary avaratra andrefan’i Besalampy no nisy ny foibeny. Tsy misy fiantraikany mivantana amin’ny toetry ny andro eto Madagasikara intsony aloha ny fivoaran’i Jude mandritra ny telo andro manaraka ka foana avokoa ny filazana loza mahakasika ny rivodoza. Tombanana hiditra an-tanety any Mozambika i Jude anio maraina ka hivoatra an-tanety hatramin’ny rahampitso ary hiverina ao amin’ny lakandranon’i Mozambika indray, aorian’izay. Mety hanambana mivantana ny faritra Menabe na Atsimo Andrefana indray, araka izany, i Jude raha ny vinavina lavitra ezaka.
Vonjy
French