Miara-miasa ny fanjakana malagasy sy ny masoivohon’i Sina eto amintsika, hampiroboroboana ny teknolojia Juncao. Teknika mifototra amin’ny fambolena holatra, azo atao sakafom-biby sy ampiasana amin’ny zavatra hafa.
Miisa 25 ny teknisiana malagasy manaraka fiofanana miompana amin’ny fifehezana ny teknolojia Juncao eny amin’ny Sekoly teknika fampiofanana EFTA Ambatobe. Avy any amin’ny faritra samihafa izy ireo ary maharitra 30 andro ny fiofanana. Tanjona, ny fampiharana sy ny fampitomboana ny fahalalana momba ny teknolojia Juncao amin’ny sehatry ny fambolena sy ny fiompiana. Hatsangana ny ivontoerana fitaratra, ahafahan’ny mpiofana mijery, mahita ary mampihatra mivantana ny fahalalana rantoviny sy ny fahaiza-manao azony.
Tsiahivina fa taorian’ny fihaonan’ny minisitry ny Fambolena sy ny fiompiana, Hajarison François Sergio, sy ny masoivohon’i Sina eto Madagasikara, Ji Ping no nahatongavana amin’izao fiaraha-miombon’antoka, hampiroboroboana ny fampiasana ny teknolojia Juncao izao eto Madagasikara.
Ampiasaina amin’ny lafiny maro
Efa voaporofo fa teknolojia sinoa manana tombony maro sy ny mampiavaka azy ny Juncao. Mifototra amin’ny fambolena holatra, feno otrikaina, azo atao sakafo mahavelona sady mampitombo haingana ny biby fiompy. Azo ahodina hikojakojana ny vatana sy tarehy. Azo ahodina ho angovo azo havaozina ihany koa. Famokarana afaka miatrika ny fiovan’ny toetr’andro, indrindra aty Afrika rahateo. Efa maro ny firenena afrikanina miara-miasa amin’i Sina hampiroboroboana ny teknolojia Juanco, toa an’i Burkina Fasso, ohatra. Ary tojo amin’izao fiaraha-miasan’i Madagasikara sy i Sina izao. Azo antoka fa hitondra zava-baovao eo amin’ny fomba famokarana amin’ny fambolena sy fiompiana ny fisian’ny teknolojia Juncao, izay miteraka fampandrosoana ara-toekarena.
Njaka Andriantefiarinesy
French