Mandray anjara amin’ny fampandrosoana ny harin-karena faobe ny orinasa madinika sy salantsalany. Miantoka ny fampihenana ny fanafarana entana atao izy ireny saingy ilaina kosa ny fiarovana ny kalitao sy ny fenitry ny tolotra.
Miantoka ny fampandrosoana ny toekarena eto amintsika ireo orinasa madinika sy salantsalany. Manandratra avo ny vokatra eto an-toerana izy ireny, fa indrindra mampihena ny fanafarana entana avy any ivelany ataon’i Madagasikara. Antoka ho an’ny fampiroboroboana ny harin-karena faobe. « Tokony ho sarotiny ny rehetra amin’ny fiarovana ny kalitao sy ny fenitra amin’ireo tolotra samihafa manerana ny lafivalon’ny Nosy. Antoka hahazoana tombony amin’ny fisokafan’i Madagasikara eo amin’ny faritra iraisam-pirenena izany », hoy ny minisitry ny Fampiroboroboana ny indostria sy ny varotra, Ralambofiringa David, nandritra ny fankalazana ny Andro maneran-tany ho an’ny zon’ny mpanjifa (JMDC), tany Antsirabe, ny sabotsy teo. Nanentana ny rehetra amin’ny fampiroboroboana ny famokarana eto an-toerana sy ny hanjifana ny vokatra malagasy izy. Tanjona ny hanohanana ny orinasa mpamokatra sy ny fihariana ataony hampandrosoana ny toekarena ary koa hisokafan’ny vokatra malagasy eo amin’ny tsena iraisam-pirenena.
Hiara-hientana
Vonona hiara-miasa amin’ny minisitera hiarovana ny zon’ny mpanjifa ireo fikambanana mpiaro ny zon’ny mpanjifa sy ireo manam-pahefana any amin’ny faritra. Hojerena manokana, hoy izy ireo, ny tombontsoan’ny mpanjifa. Nanamafy ihany koa ny minisitra fa misokatra amin’ny mpanjifa ny varavaran’ny minisitera. “Sahia miteny rehefa misy ny tranga heverintsika mahafatiantoka na miteraka voka-dratsy”, hoy ny fanazavany. Marihina fa natokana hifandraisana amin’ny mpanjifa ny laharana maitso hiantohana ny mangarahara tanteraka.
Tsiahivina fa lohahevitry ny fankalazana ny “JMDC 2025” ny fiovana ara-drariny mankany amin’ny endri-panjifana maharitra mba hisian’ny safidy maro eo amin’ny tsena isam-paritra aty Afrika.
Henintsoa Hani
French