“Manoloana ny ady misy any ivelany amin’izao fotoana izao, tokony hiroso bebe kokoa amin’ny fahavitan-tena ara-tsakafo isika Malagasy. Efa izany rahateo no laharam-pahamehana apetraky ny fitondram-panjakana.” Io ny nambarana’ny filohan’ny Antenimierampirenena, i Tokely Justin, tamin’ny famaranana ny fivoriana ara-potoana voalohan’ny Antenimierampirenena teny Tsimbazaza, omaly. Ilaina koa ny fiezahana hamokatra ny filana eto an-toerana mba hampihenana ny fanafarana ny zavatra ilain’ny vahoaka andavanandro.
Ny amin’ny fahapoizinana ara-tsakafo: mankahery hatrany ny fanjakana sy ny tomponandraikitra isan-tokony hanohy ny ezaka hahitana ny tena marina momba an’iny tranga nisiana faty olona iny ny Antenimierampirenena. Entanina ny vahoaka hitandrina sy hanome vaovao marim-pototra ary hifanome tanana amin’ ny tomponandraikitra hisorohana sy hiadiana amin’ny fahapoizinana ara-tsakafo.
Taratry ny demokrasia
Volavolan-dalana 13 kosa no voarain’ny biraon’ny Antenimierampirenena. 11 lany tsy nasiam-panitsiana, ary ny roa lany nasiam-panitsiana efatra. 14 ireo tolo-dalàna, ka valo ao amin’ny Antenimierampirenena ary ny dimy avy any amin’ny Antenimierandoholona. Enina no lany izay nasiam-panitsiana. Valo no nolaniana tamin’ireo tolo-dalàna.
Tontosa soa aman-tsara tamin’ny 12 sy 13 jona ny fifanatrehan’ny governemanta sy ny solombavambahoaka. Nahitana taratra ny demokrasia sy ny fanajana ny fifandanjam-pahefana izany. Nahatsapana ny fahamatorana ara-politika sy ny finiavan’ny governemanta ary ny fitondram-panjakana hanatanteraka ny vina napetrany amin’ny famitana ireo fandaharanasa voafaritra ao amin’ny Politika ankapoben’ny fanjakana (PGE) ny fihaonana.
R. Nd.
French