Fampandrosoana ny kaominina : Hifampizara traikefa ny fikambanana AVCOI

“Sehatra iray nomena an’ ireo ben’ny Tanàna hifam­pizarana traikefa ny AVCOI”. Io ny fanazavan’ny sekretera jeneralin’ny fiadidiana ny Tanànan’Antananarivo Re­ni­vo­hitra, Andrianambony Na­la Clara Michel, ny amin’ny fivoriambe isan-taon’ny fikambanan’ny ben’ny Tanàna mitantana tanàn-dehibe aty amin’ny faritry ny ranomasimbe In­dianina (AVCOI) izay hatao eto Antananarivo, ny 8 sy 9 jolay. Nijoro hatramin’ny taona 1990 ny AVCOI, izay misy mpikambana 16. Hanamafi­sana ny fahaiza-manaon’izy ireo izany. Eo koa ireo teknisianina manampy ny ben’ny Tanàna amin’ny fanatante­rahana ny politika mampan­droso ny tanàna.
Toy izany ny fametrahana tondrozotra amin’ny politika fampivoarana iraisan’ny mpikambana. Tombontsoan’An­tananarivo Renivohitra mivantana, misy an’ireo mpamatsy vola hanatrika ny fivoriana. Azo resen-dahatra amin’ny tetikasam-pampandrosoana noheverin’ny ben’ny Tanàna hatao eto Antananarivo izy ireo. Eo koa ny fampahafantarana ireo tetikasa misy sy ny an-dalam-panatanterahana ary handresen-dahatra an’ireo mpamatsy vola miara-miasa amin’ny AVCOI.
Nanasana ben’ny Tanàna amin’ny tanàn-dehibe 33 eto Madagasikara ny fivoriana, ary tanàn-dehibe 37 manodidina an’Antananarivo Renivo­hitra. Handinihana sy hiomanana sy ho fiatrehana ny fiovaovan’ny toetr’andro izany sy ny miralenta ary hamelabelarana koa ny fomba fanatsa­rana ny fitantanana ny kaominina sy ny famatsiam-bola an’ireo tetikasa ao anatin’ny vondrombahoaka itsinjaram-pa­hefana.

R. Nd.