Tazomoka mandripaka any Ikongo: Ifarimbonana ny vonjy aina ny mponina

Tonga mivantana ao amin’ ny distrika Ikongo ireo solontenan’ny governemanta. Ahi­tana minisitra efatra izany, toy ny minisitry ny Mponina, Ra­zafinjato Aurélie, ny minisitry ny Atitany, sns. Mifarimbona amin’ny fanohanana ireo mponina any an-toerana mano­loana ny fandripahan’ny valan’ aretina tazomoka izy ireo.
Manatanteraka avy hatrany ny fanaraha-maso sy manamafy ireo toromarika ary miara-mandray an-tanana ny maharary ny mponina ao an-toe­rana izy ireo. Ho fanajana ny fomban-tany dia natao ny fi­fampiresahana tamin’ireo ray aman-dreny ara-drazana Ana­kandria sy Mpanjaka tao amin’ ny Lapa Vonikazo.
Notsidihana avy hatrany ny toeram-pitsaboana manakaiky vahoaka. Nizarana sa­kafo mafana sy ara-pahasalamana ireo reny sy ankizy miisa 403 ao amin’ny fokontany Vo­ni­kazo sy Ambatofotsy. Nomena fehezan-karona misy sakafo tohan’aina kosa ireo mbola ao anaty fitsaboana sy marefo ara-pahasalamana miisa 82.
Nojerana ihany koa ny toerana fandrindrana ireo asa iarahan’ny mpiara-miombon’ antoka rehetra. Loham-pianakaviana miisa 100 no nandray anjara tamin’ny asa iombo­nana sady ahazoana tohana ara-tso­sialy teo amin’ireo toerana ireo.
Hitohy mandritra ny fotoana maharitra ny fandraisana an-tanana ireo mponina misedra voina ao Ikongo ary eo akaikin’ izy ireo ny fanjakana amin’ny alalan’ireo mpikambana ao amin’ny governemanta tonga any.

Tatiana A