Volana maneran-tany ho an’ny aretina alzheimer ny septambra, manao antso ho an’ny isam-batan’olona, ny mpiasan’ ny fahasalamana, ny fiarahamonina ary ny fanjakana handray andraikitra ny fikambanana Madagascar Alzheimer Masoandro mody. Mbola mipetraka ho sakana tsy ahafahana mitily ny aretina mialoha sy mitondra fitsaboana mahomby ny fanilikilihana sy ny hevitra raiki-tampisaka momba ny Alzheimer.
“Fantaro ny Alzheimer” no lohahevitra nosafidina ho an’ity taona ity, maneran-tany, satria betsaka ny olona tsy mahafantatra ny aretina. Araka ny fanadihadiana, 80% ny olona sy 65% ny mpiasan’ny fahasalamana no mihevitra fa dingana firosoana amin’ny fahanterana ny aretina Alzheimer. Araka ny tomban’ny Institute of Health Metrics and Evaluation, hatramin’ny taona 2050, olona 160 000 no heverina fa tratran’ny Alzheimer sy ireo aretina mitovy aminy eto Madagasikara. Amin’izao fotoana, 55 tapitrisa ny olona voany maneran-tany.
30 taona nikarakarana ny olona tratran’ny Alzheimer ny fikambanana Masoandro mody eto Madagasikara. Mikarakara hetsika maro ny fikambanana amin’ity volana ity ka voalohany ny dinika torapo izay fihaonana hanamaivanana ny fianakaviana mitaiza marary. Ny sabotsy ho avy izao, eny amin’ny foiben’ny fikambanana eny Fenomanana Mahazoarivo, ny fotoana manomboka amin’ny 9 ora. Tanjona ny ahafahan’ireo fianakaviana manana marary mizara ny olana mavesatra mianjady aminy isan’andro ary koa ahitany namana vaovao misedra olana mitovy aminy.
Vonjy
French