Vita tamin’ity herinandro ity ny fanaovan-tsonia fifanaraham-piaraha-miasa teo amin’ny minisitry ny Fampianarana ambony sy ny fikarohana ara-tsiansa, Pr Chaminah Loulla, sy ny solontena maharitry ny Pnud eto Madagasikara, i Edward Christow.
Fametrahana ny University Innovation Pod (UniPod) no nifantohan’ny fiaraha-miasa. Tetikasa novolavolain’ny fitaleavana momba ny fikarohana sy ny haivao (DRI), ao anatin’ny fitaleavana ankapoben’ny fikarohana ara-tsiansa (DGRS) izy ity.
Hanana rafitra iaraha-mitantana amin’ny Mesupres, ny Pnud, ny Oniversite, ny ivontoeram-pikarohana ary ny solontenan’ny sehatra tsy miankina izany.
Laboratoara 5 momba ny angovo azo havaozina, faharanitan-tsaina sy robotika, fifindran’ny teknolojia, sakafo sy indostria agro-alimentaire no ho hita ao.
Toerana hampifandraisana ireo tanora, mpikaroka sy mpandraharaha ny Unipod, ahafahan’izy ireo mamolavola hevitra sy fikarohana mitondra vahaolana sy fanavaozana ary ny fampandrosoana maharitra mifanaraka amin’ny zava-misy eto amin’ny firenena.
“Endrika velona amin’ny nofinofy ho an’ny fikarohana siantifika malagasy ary manome lanja ny tanora, ny famoronana, ny vahaolana ary ny fahaleovantena ny sehatra toy izao”, hoy ny minisitra.
Tatiana A
French