Iankinan’ny fampianarana any an-dakilasy ary miantoka ny fivelaran’ny ankizy ny boky ampiasaina any an-tsekoly. Saro-pady ka mila lanjalanjaina tsara ireo karazana boky ampiasaina na vakian’ny ankizy sy hanomezam-pahalalana azy ireo, araka izany.
Toraka izany ny boky fampianarana ampiasain’ny mpampianatra hampitana fahalalana.
Noho izany indrindra no anaovana ny fanofanana ireo mpanombana bokin’ny mpianatra. Iarahana amin’ny minisiteran’ny Fanabeazam-pirenena sy ny Conférence des ministres de l’éducation des états et gouvernements de la francophonie » (Confemen) izany, eny Anosy, mandritra ity herinandro ity.
Tafiditra ao anatin’ny fiaraha-miasa eo amin’ny Confemen sy ny Unesco ny atrikasa. Ao anatin’ny tetikasa « Ressources éducatives » izay tohanan’ny AFD.
Tanjona ny hanamafisana ny fahaiza-manaon’ireo mpanombana bokin’ny mpianatra eto Madagasikara amin’ny alalan’ny fikirakirana ny fanaovana tombana izay novolavolain’ireo manam-pahaizana manokana avy amin’ny Confemen sy ny ekipa avy amin’ ireo firenena miisa 13 mandray anjara.
Tafiditra ao anatin’ny fandraisana anjara amin’ny fanatsarana sy fampanarahana fenitra ireo boky efa misy na hovokarina eto amintsika izany. Andrasana aorian’ny fiofanana ny fananganana ny drafitrasam-pirenena sy ny fanaraha-maso ny fampiharana eny ifotony ny fanofanana noraisina.
Tatiana A
French