Ho fiatrehana ny fahavaratra, miasa andro aman’alina ny Apipa ho fiarovana ny lemak’ Antananarivo mba tsy ho safotry ny rano. Eo am-panaovana ny asa lehibe manodidina ny farihin’i Masay, Ankorondrano, Manjakaray, Besarety ary Andravoahangy ny ekipan’ny Apipa amin’izao fotoana.
Fanadiovana sy fanesorana ny fako no atao amin’izany mba tsy hanentsina ny fantsona sy ny lakandrano ary ny tatatra lehibe.
Eo koa ny fanamboarana sy famerenana amin’ny laoniny ny lalan-drano manodidina ny farihin’i Masay.
Efa nisy koa ny fanetsehana olona miisa 150 nanao fanadiovana lakandrano isan’andro, tamin’ity volana ity. Nanadio ny lakandrano CR sy ny farihin’Anosy ary Marais Masay izy ireo.
Efa nanome toky ny tomponandraikitra fa tsy ahina ny tondradrano ho an’Antananarivo satria efa voadio avokoa ireo lakandrano ary atao isan’ andro ny fikojakojana izany.
Tokony ho tomponandraikitra ny tsirairay, ka tsy hanary fako any anaty lakandrano na tatatra, izay manentsina ny fikorianan’ny rano. Mila sahy mijoro mandray andraikitra manoloana ny toetra mamohehitra ataon’ireo minia manary maloto amin’ny lakandrano ireny. Ny fokontany ihany koa dia tomponandraikitra amin’ny fanaraha-maso ireo tsy refesi-mandidy mandoto ny tanàna sy ny lakandrano.
Tatiana A
French