Miato mandritra ity herinandro ity ny fampianarana, araka ny tetiandron’ny minisiteran’ny Fanabeazam-pirenena. Manahy ny ray aman-dreny fa hitohy lavareny ny fitakian’ny mpanabe ka hisy fiantraikany amin’ny fari-pahaizan’ny zanany.
Ao anatin’ny fialantsasatra voalohany, taorian’ny roa volana voalohany, amin’ny taom-pianarana 2025-2026, ny mpianatra amin’ny ambaratonga rehetra nanomboka omaly. Haharitra hatramin’ny 31 oktobra ho avy izao izany, araka ny tetiandron’ny minisiteran’ny Fanabeazam-pirenena. Miverina miatrika ny roa volana faharoa indray ny alatsinainy 3 novambra hatramin’ny 19 desambra. Mizotra tsara ny fanohizana ny fandaharam-pianarana ho an’ny sekoly tsy miankina rehetra, taorian’ny fiverenan’ny toe-draharaham-pirenena amin’ny laoniny. Mbola miato kosa izany eny anivon’ny sekolim-panjakana noho ny fitakiana sendikaly.
Nanomboka ny 25 septambra no ho mankaty, tsy nandray mpianatra mihitsy ny toeram-pampianarana miankina amin’ny fanjakana satria tsy niasa ny mpampianatra. Tsy misy ny lamina manokana fa miandry ny fiverenan’ny fampianarana ny talen-tsekoly sy ny ray aman-dreny, raha ny fanazavana azo. Nampiaka-peo ny ray aman-dreny satria adino avokoa ny lesona voaray. Tsy afaka ny hanaraka ny famerenana ao an-trano rahateo izy ireo fa sahirana amin’ny fitadiavana. “Fanararaotana izao hitakina ny maharary rehetra ho an’ny mpanabe ka mandefitra aloha ny mpianatra”, hoy ny sendikàn’ny mpampianatra.
Efa mikaroka vahaolana hamenoana ny banga ny talen-tsekoly raha vao miverina ny fampianarana. Haverina hariva ny mpianatra raha tapakandro ihany no nianatra teo aloha.
Manahy ny ray aman-dreny fa hanimba ny fari-pahaizan’ny zanany ny fiatoan’ny fampianarana maharitra. Tsy mitovy ny fandraisana ny lesona ary tsy maintsy vitaina ny fandaharam-pianarana ho an’ny taranja rehetra. Manana tombony ny sekoly tsy miankina eo amin’ny fotoana.
Vonjy
French