Lavon’ny tifitry ny zandarimaria, nandritra ny fisafoana tao amin’ny kaominina Ambondromamy, distrikan’Ambato-Boeny, afakomaly, ny jiolahy iray. Manoloana ny fitarainana voarain’izy ireo eny anivon’iny faritra iny, nanao paikady manokana tamin’ny alalan’ny fisafoana alina eny amin’ny manamorona ny lalam-pirenena faha-4 ny zandary miasa eo anivon’ny vondron-tobim-paritra ao an-toerana. Nifanehatra tampoka tamin’ny mpanao ratsy ny zandary. Nanao tari-dositra avy hatrany ireo mpanakan-dalana rehefa nahatazana ny mpitandro filaminana. Raikitra ny fanenjehana ary nanapoaka basy ny mpanao fisafoana. Niparitaka tanaty haizina ireo dahalo raha toa ka voan’ny bala ny iray tamin’izy ireo. Natao ny fanamarinana ka fantatra fa i Lavapizo io lavo io. Dahalo efa nokarohin’ny zandary miasa ao an-toerana hatry ny ela ity farany. Taksiborosy mampitohy ireo renivohi-paritany matetika no iharan’ny asa ratsy ataon’ireo mpanakan-dalana. Nanamafy ny zandarimaria miasa ao an-toerana fa mitohy ny ady amin’ny asan-dahalo. Tanjon’izy ireo koa ny hametrahana ny fandriampahalemana maharitra.
Tsiferana R.
French