Amin’ny lafiny roa samy hafa. Nosokafana tamin’ny fomba ofisialy tetsy amin’ny lakandrano Andronomadio, parisela 11/42, ny asa tanamaro. Ifanohanan’ny minisiteran’ny Mponina sy ny firaisankina, tarihin’ny minisitra Raharinirina Sidonie, sy ny kaominina ambonivohitr’i Toamasina, tarihin’ny ben’ny Tanàna, Andriafanomezantsoa Alain, ny asa. Voalohany, natao ho fanohanana ara-tsakafo sy vola ho an’ireo marefo ara-pivelomana eny anivon’ny fokontany izany. Faharoa kosa natao hitsinjovana sahady ny fotoam-pahavaratra noho ity fokontany ity mora dibo-drano.
Nambaran’ny minisitra fa miisa 600 ny olona mandray izay tambiny izay ary haharitra 20 andro ny asa. Mihoatra izany nefa ny mpandray anjara ka finiavana sy tolo-tanana no an’ny sasany, toy ny zandary sy ny Tafika tonga maro ao an-toerana. Fanombohana ihany ity fa betsaka ny hanohizana azy amin’ny manaraka, handraisan’ny hafa indray asa atakalo vary sy vola.
Nohamafisin’ny ben’ny Tanànan’i Toamasina fa fotoana izao hilazana fa efa nivoaka ny lalànan’ny fahadiovana sy fidiovana. Tsy ho ekena intsony, araka izany, ny fanariam-pako eny ambany tetezana, an-dalana, ny fisavana ny fahadiovan’ny tokotany ary hisy fanesorana trano ambony tatatra
Sajo
French