Ny Jirama hatrany no fantatra rehefa miresaka ny sehatra angovo eto Madagasikara. Maro nefa, hoy ny mpikirakira azy, ireo mpisehatra miara-misalahy amin’ny famokarana sy fampihodinana izany. Rano, masoandro, rivotra, ranomasina…
«Mbola ambany ny taham-pisitrahan’ny Malagasy herinaratra noho izy mitaky famatsiam-bola, manampy trotraka ihany koa ny fikirakirana antontan-taratasy samihafa », hoy ny mpitantana sy mpanorina ny kabinetra Phaos, Razanakolona Tokiniaina. Nambarany fa mbola ny 36% ny Malagasy no misitraka izany, ity farany izay miantoka ny andavanandron’ ny mponina sy ny fivelomany. “Misandrahaka amina sehatra marolafy, mifampiankina, ny rojom-pihariana angovo. Mpisehatra lehibe ao anatin’izany ny orinasa sy ny indostria. Izy ireo izay anisan’ny mandany hatrany amin’ny 55% ny famokarana vokarin’ny Jirama”, hoy Raherison Onja Michael, mpitantana ny kabinetra.
Ankoatra izay, nandroso soso-kevitra ireto manam-pahaizana ny tokony hampiarahana izany amin’ny fitaovam-pamokarana hafa toy ny rano, ny entona, ireo loharan’ angovo mandeha amin’ny herin’ny masoandro, mba hahazoana tombony maharitra.
Ambany
Mbola latsaky ny 40% ny angovo eto amintsika no voatrandraka, izay ilana fiaraha-mientan’ny sehatra rehetra ho fampiroboroboana izany. Manana andraikitra goavana ao anatin’izay ny sehatra tsy miankina. Toy izany koa ireo matihanina sy manampahaizana ary mpiara-miombon’antoka ara-teknika sy ara-bola afaka hitondra ny fahaiza-manaony sy ny anjara birikiny hamahana ny olan’ny famatsiana herinaratra, raha ny fanazavana hatrany. Ankilany, tokony hanaraka ny fivoaran’ ny teknolojia ny fanjakana mba hananana tetikasa tsara sy mahomby ary maharitra.
Henintsoa
French