« Efa 30 taona mahery ny naneken’i Madagasikara ny fifanarahana iraisam-pirenena momba ny zon’ny ankizy raha ny ara-taratasy (reforme légale), ny fanatanterahana isan’andro mbola olana ». Io ny nambaran’ny filohan’ny Vovonan’ny firaisamonim-pirenena miaro ny ankizy (PSCFE), ny maître Raharinarivonirina Maria, omaly, teny amin’ny kianja Alarobia. Manao antso ny fikambanana miisa 66 mpikambana ao anatin’ny Vovonana ny hijerena haingana ny tsy fanjarian-tsakafo sy ny tsy fandriampahalemana ary ny fanabeazana manana kalitao ho an’ny ankizy rehetra. Tena maika ireo sehatra telo ireo ary tsy mitsahatra manao adisisika ho fiarovana ireo zo fototra ny fikambanana. Anisan’ny nahazo fanasana hanatrika ny fikaonandoham-pirenena karakarain’ny Fanavaozana ny Repoblika ny Vovonan’ny firaisamonim-pirenena ka hitondra soso-kevitra maro amin’izany.
“Ho an’ny Kaominina Antananarivo Renivohitra, mpianatra 50 000 no sahaniny eny amin’ny EPP ka jerena ny fahasalamany, ny fiarovana ny zony sy ny fianarany ary ny sehatra hafa”, hoy ny ben’ny Tanàna Ramanantsoa Harilala. Hatramin’ny faran’ny volana, misy hetsika maro hanamarihina ny fanajana ny zon’ ny ankizy. Anisan’izany ny fitondrana ny ankizy hitsidika ny toerana manan-tantara sy vakoka misy eto an-dRenivohitra. Eo koa ny fanentanana amin’ny famakiana boky eny amin’ny tranomboky fito ato anatin’ny kaominina. Manampy ireo ny fijerena sarimihetsika ka omena sehatra ny ankizy amin’ny fampahafantarina ny zony sy hizarany ny fanantenany ho amin’ny hoavy.
Vonjy
French