Mijanona ho lohalaharana amin’ny herisetra mpahazo ny ankizy ny tsy fisiana ara-bola eo anivon’ny tokantrano. Ahitana izany avokoa na ny any ambanivohitra na ny an-tanàn-dehibe, saingy mahery kokoa izany aty an-drenivohitra.
Antony nanaovana ny atrikasa hiadina amin’ny herisetra mpahazo ny ankizy, hiantohana ny fiarovana azy ireo, no natao teny amin’ny Motel Anosy, ny 13 novambra teo. Hetsika nokarakarain’ny fikambanana masera Emmanuelle (Asmae). Niarahany tamin’ireo mpiara-miombon’antoka sy tambajotra ho fiaraha-mientana izay tafiditra ao anatin’ny fandaharanasa “Ankizy” andiany fahatelo (3), ny “Tanora” andiany faharoa (2) ary ny AIM. Tanjona ny hanamafisana ny fiaraha-mientana sy ny fandraisana andraikitr’ireo mpisehatra marolafy miaro ny zon’ny ankizy sy ny tanora. Nisy, araka izany, ny atrikasa niarahana tamin’ireo mpiara-miombon’antoka maherin’ny 80, niarahan’izy ireo nifampizara traikefa sy ny fomba fandraisana an-tanana ny tranga ary ny fiaraha-mamolavola vahaolana iombonana hanatsarana ny fomba fandraisana fitarainana.
Tetikasa
«Ny tetikasa Ankizy dia misehatra amin’ny tontolon’ny fanabeazana amin’ny vanim-potoana rehetra na amin’ny hamehana na amin’ny andavanandrom-piainany. Ny fiaraha-miasa tamin’ireo mpiara-miombon’antoka samihafa no nahafahana nampita sy nanaparitaka tamin’ireo matihanina sy vondrona isan-karazany ny fahaiza-manao ka ny vokatra pedagojika no ahafahana manena ny herisetra», hoy ny tomponandraikitry ny Asmae, Andriamiarana Vatosoa. Tanjona ny hampifanaraka ny foto-kevitra fototra momba ny fiarovana ny ankizy eto Madagasikara sy hamantarana ireo mpisehatra sy ny andraikitra sahaniny avy.
Nohamafisin’ny fikambanana Asmae sy ireo mpiara-miombon’antoka aminy ny fanoloran-tenany amin’ny fiarovana ny ankizy anatin’ny fanajana ny zon’olombelona.
Henintsoa
French