Nahavita lalana tsy nisy lesoka ny ekipan’ny Disciples FC Vakinankaratra nandritra ny fifaninanana « Tournoi des Grands Élites », izay natao tao amin’ny kianja Velodrome Antsirabe, ny 9-13 desambra lasa teo. Fandresena roa nifanesy sy lalao iray nifarana tamin’ny ady sahala no naha tompondaka azy ireo tamin’ity fifanintsanana ity. Ny sabotsy teo, nanao ady sahala 1 no ho 1, tamin’ny klioba avy any Boeny, Fosa Juniors FC, izay laharana fahatelo tamin’ity lalao ity ny mpilalaon’i Vakinankaratra. Ity klioba avy atsy Boeny ity, saika mpilalao avy ao amin’ny akademiany avokoa no mandrafitra azy ankehitriny. Ankoatra izay, mipetraka eo amin’ny laharana faharoa teo amin’ny lampihazo fandraisana amboara, ny Cosfa miaramila rehefa nahazo fandresena, 3 no ho 0 nanoloana ny ekipa tompondakan’ny ligin’i Vakinankaratra, AS Valahara. Tsara ny mampahafantatra fa nahazo lelavola 2 tapitrisa ariary ny ekipa tompondaka ary 5 hetsy Ariary ny an’ny faharoa. Samy nandray 2 hetsy Ariary kosa ny fahatelo sy ny fahefatra. « Efa roa volana teo izahay izao no nanomana ary efa hiditra ny volana fahatelo amin’ izany izao. Ny olana fotsiny, dia somary mifamafao ihany ny vaovao henonay, amin’ny daty ofisialy hanombohan’ny fifaninanana, ao ny hoe : tsy manomboka amin’ny 21 desmabra, indraindray hoe hatao amin’io 21 io ihany, ka tsy fantatra intsony ilay izy, ka lasa manomana an-jambany fotsiny ny klioba. Avy eo ny toe-batan’ ilay mpilalao tsy any amin’ilay ilana azy no tena mivaly. Na eo aza izany, miezaka izahay teknisianina manoloana izany rehetra izany. Ny lalao ara-pirahalahiana no atao maro, ary efa mametraka sahady ny paikady ara-taktika izahay », hoy ny « staff » iray teo anivon’ny Disciples FC. Ny 28 desambra izao, any Toamasina, hanao fihaonana ara-pirahalahiana amin’ireo mpila ravinahitra any ivelany, ny Disciples FC Vakinankaratra.
Fitia Randria
French