Hofaranana eny Ivandry, anio, ny tetikasa « Mamiratra ». Nifarimbonan’ny fikambanana Cœur des bénévoles sy ny fikambanana Manampy mahatony ary ny fikamban’ny mpianatra momba ny psycho-social eny Ankatso (AE-PSI) ity hetsika ity.
Anampiana ireo ankizy sahirana ara-pivelomana miisa 41, anaty salan-taona 10 hatramin’ny 14 taona, mianatra ao amin’ny fikambanana Manampy mahatony ny tetikasa, araka ny fanazavan’ny filohan’ny fikambanana Coeur des Bénévoles, Tahinamalala Tandrianarison.
Novoizina tao anatin’ny asa, nandritra izay roa volana izay ny fandraisana an-tanana ny ara-psyko-sosialy sy ny hetsika mampiala voly sy mampiasa saina ireo mpianatra. Tanjona ny hahafahan’izy ireo mahatoky tena sy mampandroso ny tenany ka tsy hiantehitra amin’ny hafa ary ho sahy manapa-kevitra manoloana ny toe-javatra iray.
Ao anatin’ny famaranana ny tetikasa anio no ahitana ny karazana seho ataon’ireo ankizy. Hitarafana ihany koa ny fivoaran’izy ireo nandritra ny tohana ara-tsaina sy fankaherezana nomena azy ireo. Hisy koa ny fizarana mari-pankasitrahana ho an’ireo tanora nanao ny asa an-tsitrapo nandritra ny roa volan’ny tetikasa.
Tena ilain’ny ankizy ny fanohanana ara-tsaina satria miaina ny vesatry ny fiarahamonina sy ny rotorotom-piainana ihany koa izy ireny. Tsy tokony hatao ambanin-javatra izany fa manampy be ny ankizy hanana fivelarana sy fahatokisan-tena ary ho sahy hijoro.
Tatiana A
French