Tafiditra ao anatin’ny fomba fiasa ho fampitiavana sy ho fampivelarana ny tontolon’ny kabary, tanterahin’ny fikambanana Manda Mpikabary, ny fampianarana izany maimaimpoana. Eny amin’ny biraon’ny boriborintany miisa 6 eto an-dRenivohitra no hanatontosana izany. Hetsika hanomboka ny sabotsy 17 janoary sy ny alahady 18 janoary ho avy izao. Haharitra 7 volana ny fampianarana. Isaky ny sabotsy tolakandro ny fampianarana. Nasongadin’ny mpitantana ity fikambanana ity fa : « fahalalana maro no azo avy amin’ny kabary. Tsy misaraka amin’ny kabary rahateo ny fiainan’ny Malagasy miainga any amin’ny fahaterahana ka hatrany amin’ny fandevenana ».
Nohamafisin’ireo mpitantana ny Manda Mpikabary ireo fa « mirakitra fahendrena ary tena mikolo ny saina ireo tsilalaon-teny, ohabolana, hainteny maro hita ao anatin’ny kabary. Mametraka rafi-tsaina mifototra amin’ny fahendrena malagasy ny kabary ka azo heverina ho fanoitra iray ampiakarana ny lanja ara-tsain’ny firenena ». Nanterin’izy ireo fa : « azo atao ny ho tonga mpikabary matihanina. Azo raisana ho fanampim-pahalalana amin’ny sehatra hafa misy ny olom-pirenena ihany koa, anefa, ny kabary ».
Fantatra fa tetikasa iombonan’ny Manda Mpikabary amin’ny Fitaleavana misahana ny Fampandraisana anjara ny olom-pirenena sy ny fiainam-piarahamonina eo anivon’ny Kaominina Antananarivo Renivohitra (DPCVC-CUA) ito fampianarana kabary tsy misy sarampianarana ito.
Nanangona : HaRy Razafindrakoto
French