“Dendrophile”, entina hilazana ireo olona mpankafy ny hazo sy ny tontolony. Lohahevitra iompanan’ny fampirantiana “Antson’ny tontolo miaina” amin’ity andiany fahatelo ity ihany koa izany. Nisy ny fampahafantarana ny hetsika, notontosaina omaly, tetsy amin’ny Zone Vital Ankorondrano, toerana handray ny fampirantiana fototra, manomboka ny 17 janoary hatramin’ ny 6 febroary izao. Nialoha izay, efa nahitana sombiny teny amin’ny seranam-piaraminidina iraisam-pirenena Ivato. Mbola mitohy ity farany hatramin’ny faran’ny volana febroary. Nanomboka ny alatsinainy teo kosa ny fampirantiana voalohany etsy amin’ny Flow Galery Ivandry.
“Mampiasa ny hainay, mampita hafatra amin’ny alalan’ny zavakanto izahay. Mizara ny fitiavana ny hazo koa. Mpanakanto 10 no handika izay fitiavana izay amin’ny alalan’ireo seha-kanto marolafy araka ny fironany avy”, hoy ny mpikarakara ny hetsika. Ahitana mpanoratra toa an’i Johary Ravaloson, Jessica Salomon, nanangana ny “Faka Rugs”, Miangaly Elia, Kiady Ratovoson, Iandry Randriamandroso, Joan Razafimaharo, Noely Ratsimiebo, Rado Ramilison ary Sham’ Archi ireo handray anjara
amin’izany.
“Ahoana no ahafahan’ny fitiavana hazo manampy antsika hikarakara ny tanintsika, izay efa mena sy mijaly ary hanantena indray tontolo maitso kokoa ho an’ny hoavy?” Hamaly io fanontaniana io ny fampirantiana.
Zo ny Aina
French