Efa maro ireo miandry vaksiny miaro amin’ny aretina Mpox. Fantatra izao fa efa an-dalam-panafarana izany ny fanjakana.
Fantatra nandritra ny tatitra nataon’ny minisitry ny Fahasalamam-bahoaka tao amin’ny TVM fa efa miroso amin’ny fanafarana ny vaksiny miaro amin’ny valanaretina Mpox ny fanjakana amin’izao fotoana. Hatao laharam-pahamehana hisitraka izany ireo sokajin’olona marefo. Izy ireo izay tena hatahorana amin’ny aretina.
Anisan’izany ireo zokiolona sy olona manana areti-mitaiza. Eo koa ny mpiasan’ny fahasalamana noho izy ireo mifanerasera akaiky amin’ny marary.
Efa maro ireo sitrana ary tsy mbola nisy ny aina nafoy, araka ny tatitra nataon’ny minisitra hatrany.
Efa am-perinasa avokoa ireo toerana manokana hahafahana mampihiboka ny marary sy mikarakara azy ireo eny amin’ny hopitaly. Ampy ny fanafody ary efa nomena fiofanana manaraka ny vanim-potoana ireo mpiasan’ny fahasalamana mandray an-tanana izany.
Tetsy andaniny, nampahafantatra ireo asa miandry ny minisitera ihany koa ny minisitra. Vaindohan-draharaha ny hamerina ny fifampitokisan’ny vahoaka amin’ireo mpiasan’ ny fahasalamana. Imasoana,
noho izany, ny fanatsarana ny fandraisana marary, ny firosoana amin’ny fanomezana tolotra ara-pahasalamana ara-drariny sy tsy manavaka.
Aparitaka manerana ny faritra ireo dokotera manam-pahaizana manokana hampihenana ny fivezivezen’ny marary.
Tao anatin’ny roa volana niasana, nimatimatesana tamin’ny tolona ny ady amin’ny kolikoly sy ny fampiharana ny mangarahara sy ny tamberin’ andraikitra ka tafiditra ao anatin’ny laharam-pahamehan’ny minisiteran’ny Fahasalamam-bahoaka ireo.
Miverina tsikelikely ny fifampitokisana eo amin’ny mpiara-miasa sy ny minisitera satria nosokafana ny sehatra fifampidinihana ary omena alalana haneho hevitra ny mpiasa.
Tatiana A
French