Notanterahina ny alarobia lasa teo, tetsy amin’ny foibe toeran’ny federasionina malagasin’ ny atletisma Alarobia, ny fifidianana izay ho filohan’ ny ligin’Analamanga, taranja atletisma. Lany hitantana izany, mandritra ny efa-taona manaraka, Razafimandimby Roger. Miisa roa ireo kandidà nifaninana tamin’izany, Andriamahery Fanomezantsoa sy Razafimandimby Roger. Seksionina dimy no nandatsa-bato, Antananarivo Renivohitra, Avaradrano, Atsimondrano, Ambohidratrimo ary Manjakandriana. Nahazo vato telo i Roger, raha roa ny an’i Fanomezantsoa. “Hiasa ary hitety anareo seksionina. Tsy hitantana ny fanampiana ara-bola omen’ny federasionina aho fa hatolotra anareo, hampandrosoana ny atletisma eny ifotony”, hoy izy. Tsy olom-baovao amin’ity taranja ity ny tenany fa sady efa atleta ihany koa ary efa nitantana ny seksionina Antananarivo Renivohitra.
Nialoha ny fandatsaham-bato, nisy ny fivoriambe ara-potoana nanaovan’ireo komity mpitantana teo aloha ny tatitra rehetra ka nahazoan’izy ireo fankatoavana “quitus”. Na izany aza, nisy olana ny an’ny seksionina Ambohidratrimo izay nisy filoha roa tonga ary samy nanana ny “certificat de conformité” voasonian’ny delege tany an-toerana. Nantsoina ny tomponandraikitra ka i Hajatiana no ara-dalàna, izay afaka nandatsa-bato. Dingana manaraka ny fifidianana izay ho filohan’ny Federasionina malagasy, hatao ny 7 febroary ho avy izao, eto Antantanarivo.
Tompondaka
French