Notanterahina tamin’ity herinandro ity, teny Fiadanana sy nampitain-davitra, ny Conférence des présidents des universités (CPU) voalohany ho an’ity taona ity. Niarahan’ ny minisitry ny Fampianarana ambony sy ny fikarohana ara-tsiansa, Pr Ravonimanantsoa Ndaohialy Manda-Vy, tamin’ireo filohan’ny oniversite manerana ny Nosy, ireo tale jeneralin’ny IST telo ary ireo filohan’ny oniversitem-paritra izany. Fivoriana faratampony mandinika sy manapaka ny mahakasika ny tontolon’ny fampianarana ambony eto Madagasikara ny CPU. Nifantoka tamin’ny lohahevitra dimy lehibe ny dinika natao. Voalohany ny tetiandron’ny oniversite ho an’ny taom-pianarana 2025-2026. Hifarana ny 16 febroary 2026 ny fisoratana anarana ary ny volana novambra no hifarana ny taom-pianarana. Tapaka fa hotanterahina ny 13 marsa ho avy izao ao amin’ny Oniversiten’Itasy, Soavinandriana, ny fanombohana ofisialy ny taom-pianarana. Ho fandaminana ankapobeny kosa, ny oniversite tsirairay hanolotra olona hampifandray ny minisitera mpiahy sy ny oniversite amin’ny fampitam-baovao isan-karazany. Momba ny fanadinana Bakalorea, efa nampitaina ny daty ofisialy hanatanterahana ny fanadinana ary hapetraka ny Direction office du Baccalauréat ho an’ireo oniversitem-paritra hanamora ny fandrindrana.
Vonjy
French