Hotanterahina ny sabotsy 24 janoary ho avy izao, etsy amin’ny ANS Ampefiloha, ny fivoriambe voalohany ataon’ ny ligin’Analamanga, taranja tsipy kanetibe. Hatolotra amin’ io koa ireo fandaharam-potoana rehetra ho an’ny taom-pilalaovana 2025. Hankatoavana ny fitsipika rehetra, ara-teknika sy ara-moraly ary ny ara-bola ihany koa. Hampaha-fantarina, mandritra izany, ny mpikambana rehetra mandrafitra ny ligin’Analamanga. Tsiahivina fa vaovao ny filoha mitantana ny ligy: Andriantsiferana Ravaka. Ankoatra izay, hisy ny fihaonambe hanasana ny mpitia tsipy kanetibe rehetra ato anatin’ny faritra Analamanga, ny mpiasa sy mpilalao, ny olon-tsotra ary ireo orinasa miankina sy tsy miankina, ny mpanao gazety ary izay rehetra misehatra ao anatin’ity taranja manavanana ny Malagasy ity. Dinika hiainoana ny hetahetan’ireo sehatra rehetra ireo amin’ny fomba hanatsarana ity taranja ity eto Analamanga ka hampivoarana azy. Hita sy tsapa mantsy fa toa mihena ny lanjan’ity taranja ity, ho an’ny eto an-dRenivohitra. Ny hamerina ny lazan’izany indray eto Analamanga no tanjon’ny mpitantana ankehitriny. Anisan’ny hodinihina ny amin’ireo fifaninanana tsy anaty rafitra nefa mahazo vahana manerana ny tanàna. Ampirisihina ihany koa ireo mpilalao ho ao anaty ekipa mba hahitana ny fahaizan’izy ireo fa tsy hianona amin’ny “tournoi sauvage”.
Tompondaka
French