Notanterahina teny amin’ ny primatiora, Lapan’i Mahazoarivo, omaly, ny fanaovana sonia fifanarahana fiaraha-miasa eo amin’ny minisitera dimy momba ny lohahevitra avy amin’ny fikarohana mankany amin’ny fiantraikany. Fiaraha-miasa stratejika ho an’ny fanavaozana sy fahaleovantena ara-toekarena ho an’i Madagasikara.
“Tanjona ny hamadika ny voka-pikarohana ho fitaovana mivantana amin’ny famoronana asa. Haivao hitondra fahaleovantena ara-tokerana ho antsika », hoy ny minisitry ny Fampianarana ambony sy ny fikarohana ara-tsiansa, profesora Ravonimanantsoa Ndaohialy Manda-Vy.
Anisan’ny fiaraha-miasa eo amin’ny sehatry ny tsy miankina sy ny fikarohana izay nanohana ny toekarena ny fiompiana dingadingana avy amin’ny Malagasy mpikaroka. 15 taona izay no itrandrahana izany any Atsimo ary hiitatra any Sava sy Diana, izay voalohany aty Afrika, araka ny fanazavan’ny minisitry ny Jono sy ny toekarena manga.
Voka-pikarohana iray hafa koa ny fambolena lomotra izay nahafahana nametraka orinasa mamorona asa ho an’ny fianakaviana 5 000. Mahatratra 400 000 Ar hatramin’ny 1 tapitrisa Ar isam-bolana ny vola miditra amin’ny fianakaviana iray. Amin’izao fotoana, misy koa ny voka-pikarohana azo hamadihana ny lomotra ho plastika levona ary miandry mpandraharaha handray izany hamadihana azy ho asa.
« Nisongadina tao anatin’ ny fiaraha-miasa ny hametrahana ivontoerana iray hamatsy vola ireo voka-pikarohana samihafa ho azo jifaina amin’ ny fiainana andavanandro sy hamorona asa ho an’ny tanora manomboka amin’ity taona ity », hoy ny minisitry ny Indostria sy ny fampandrosoana ny sehatra tsy miankina, Andriniaina Rasoarahona.
Vonjy
French