“Niteny ny eny anivon’ny Antenimierampirenena fa amin’ny volana mey ny fivoriana ara-potoana… Tokony handeha amin’izay ny fiampangana ny filoha teo aloha, Rajoelina Andry. Raha ny sitrapon’ny minisiteran’ny Fitsarana, efa tamin’ny desambra no tokony ho nandeha izay. Saingy, miankina amin’ny Antenimierampirenena izay misy pitsopitsony ihany koa”. Io ny fanazavan’ny minisitry ny Fitsarana, i Ernaivo Fanirisoa, tamin’ny mpanao gazety, teny Mahamasina, nampitaina tamin’ny tambajotran-tserasera, afakomaly, ny amin’ny fitsarana ny filoha teo aloha, Rajoelina Andry. Anisan’ny hanenjehana azy ny fanodinkodinam-bola maro sy ny fanamparam-pahefana maharitra tamin’ny fampiasana volam-panjakana.
Milaza ny And. 131-134 amin’ny lalàmpanorenana fa ny Fitsarana avo (HCJ) no ahazoana manenjika ny filohan’ny Repoblika. Tsy maintsy hajaina izay. Tsy afa-manatona ny HCJ ny minisiteran’ny Fitsarana. Izay no nanaovana fiaraha-miasa tamin’ny Gen Z tamin’ny fitoriana azy eny amin’ny Fitsarana avo momba ny lalàmpanorenana (HCC). Ahazoan’ny Antenimierampirenena manapa-kevitra ny fananganana vaomiera fanadihadina momba ny fakan-kevitra rehetra. Rehefa mitsangana izay, mandeha ny fahazoana manao fiampangana, tsy misy antony intsony tsy ahazoana mitsara ny filoha teo aloha. Eo koa ny fanaovana ny fanenjehana ara-pitsarana rehetra azo atao aminy: fisavana, fanagiazana fananana sy kaonty, ny didy fampisamborana iraisam-pirenena… Ny fampodiana azy an-tanindrazana kosa dia avy amin’ny alalan’ny didim-pitsarana raikitra. Iaraha-miasa amin’ny firenena misy azy ny fanenjehana azy.
R. Nd.
French