“Mazava ny zotra ho an’ny manamboninahitra malagasy, mila miady amin’ny kolikoly”, hoy ny Filohan’ny Fanavaozana. Nohamafisiny nandritra ny Fandresena 2026, tao amin’ny Akademia Miaramila Antsirabe koa fa manana andraikitra lehibe amin’ny fanatanterahana fifidianana ny Foloalindahy.
Notanterahina tao amin’ ny Akademia Miaramila Antsirabe, omaly, ny Fandresena 2026. Navoaka tamin’ ny fomba ofisialy ny andiany iraisam-piadiana faha-22, nahitana manamboninahitra miisa 40 ka vehivavy ny dimy. Sambany, namoaka manamboninahitra vehivavy iraisam-piadiana ny Foloalindahy.
Nifanindran-dalana tamin’ izany, notanterahina nandritra ny lanonana ny fanaovana batemy ny andiany mivantana faha-XLVIII misalotra ny anarana Taratra. 90 mianadahy no manaraka ny fiofanana. Miisa 10 ny vehivavy, 10 ny teratany vahiny amin’izy ireo. Maharitra telo taona ny fianarana ka hiditra amin’ny taona faharoa izy ireo, ankehitriny.
Marihina fa efa hanomboka ny alatsinainy ho avy izao ny fanadinana dingana voalohany, handraisana ny andiany mivantana faha-XLIX sy ny iraisam-piadiana faha-23. Nahemotra kosa ny fandraisana ny andiany manokana.
Fifidianana eken’ny rehetra
Taorian’ny matso namaranana ny lanonana ara-miaramila, nisy ny nofon-kena mitam-pihavanana. Nandritra izany no nanaovan’ny kolonely Randrianirina Michaël antso avo amin’ny manamboninahitra vao nivoaka mba hanajan’izy ireo ny tokim-panompoana, ny ady amin’ny kolikoly, ny fisafidianana hiasa any ambanivohitra.
Nasiany tsindrim-peo ihany koa ny tokony handraisan’ny Foloalindahy andraikitra amin’ny raharaham-pirenena. Nambarany fa manana andraikitra lehibe izy ireo amin’ ny fanatanterahana ny fifidianana madio sy eken’ny rehetra, ka izay filoha lany dia tena avy amin’ny vahoaka.
Ankoatra izay, manentana ny olom-pirenena izy hanamafy ny fitiavan-tanindrazana.
Riana Raymond
French