Fitantanana firenena : Nanao fanamby ny tsy hanao « Tetezamiitatra » ny filoha

Nihaona tamin’ireo teratany malagasy milaravinahitra any Kenya ny filoham-panjakana, ny Kly Randrianirina Michaël, mivady sy ireo minisitra maromaro eo anivon’ny governemanta. Nampahafantariny, tamin’izany, ny momba ny raharaham-pirenena.

Nambarany fa kendrena ho vita mialoha ny fa­ran’ny taona 2027 ny fifidianana filoham-pirenena, ialohavan’ny fifidianana izay ho Lalàmpanorenana. «Tsy hisy velively izany Teteza­miitatra izany… Aoka hifantoka amin’ny fiainana sy ny asa fitadiavana fa tsy handany andro amin’ny fanaratsiana anaty tambajotran-tserasera», hoy izy. Nentaniny ny rehetra hifantoka tanteraka amin’ny fikaonandoham-pirenena, haha­tongavana amin’ireo fifidianana ka iandrandrana fiainana vaovao ho an’ny fire­nena.
Anisan’ny nanteriny nanoloana ireo mpanao gazety vahiny kosa, taorian’ny fahavitan’ny fihaonana «Africa For­ward» tao Kenya, fa anisan’ny harena ho an’i Madagasikara ny tanora. Maherin’ny 70% izy ireo, araka ny nambarany. «Latsaka ambany ny firenena ka manarina izany izahay izao ary hamerina indray ny firenena amin’ny toerana maha izy azy…», hoy izy. Momba ny fihaonana an-tampony tany an-toerana kosa, notsindriny fa ankatoavin’ny sehatra iraisam-pirenena ny dingana fanavaozana hoentin’i Mada­gasikara mankany amin’ny Repoblika vaovao.

Hanavao ny lisi-pifidiana ny Ceni
Nitohy tamin’ny fitsidihana ny tany Congo Brazzaville ny dian’ny Filoham-panjakana, mivady, ny alarobia teo. Nihaona tamin’ny filoha, Denis Sassou N’Guesso, ny tenany. Nohamafisiny, tamin’izany, fa efa nanao fianianana ireo mpikambana vaovao eo anivon’ny Ceni. «Hisahana ny fanavaozana manontolo ny lisi-pifidianana izy ireo», hoy izy. No­hamafisiny koa fa efa mandeha ny famahana ny olana politika. “Efa mandeha ny dingana ho famahana ny olana politika amin’ny fitondrana Fana­vaozana amin’izao”, hoy izy.
Nanambara kosa ny filoha Kongoley fa mitovy ny tantaran’ny firenena roa tonta, taorian’ny ady an-trano tany an-toerana ka nametrahan’ny mpitondra ny fanavaozana tao Congo Brazzaville. «Manka­hery anareo izahay. Anisan’ny nataonay ny niantso ny hery rehetra hametraka Andrim­panjakana fanavaozana… Ilaina ny fitoniana sy filaminana ho an’i Afrika ary tokony hitambatra isika hiara-hiatrika ny savorovoro eo amin’izao tontolo izao», hoy izy.

Synèse R.