Nohavaozina, ny 8 jona teo, ny fiaraha-miasa eo amin’ny Airtel Business sy ny Orinasa malagasy fitahirizam-bola sy findramam-bola (Smmec).
Fiaraha-miombon’antoka mifantoka amin’ny fampiasana tambajotra, finday maherin’ny 800, hanamafisana ny serasera anatiny, handrindran’ny Smmec ny asany manerana ny Nosy. Tanjon’ny fiaraha-miasa ny hanamafisana ny fampiasana ny niomerika, ny fanatsarana ny kalitaon’ny tolotra ary ny hampiroboroboana ny tontolo ara-bola eto amintsika.
Misitraka ny tolotry ny Vondrona Bharti Airtel daholo ireo firenena 14 misy azy aty Afrika, ka anisany i Madagasikara. Tafiditra ao anatin’ny fiaraha-miasa ny fampiasana ny tambajotra avo lenta, ny internet amin’ny alalan’ny fibre optique, ny fifandraisan-davitra tsy mampiasa tariby. Sahaza ny rehetra, ny mpampiasa ny Data Center, ny matihanina, ny orinasa, sns izy io.
« Zava-dehibe ho anay ity fiaraha-miasa ity. Tanjona ny hanome vahaolana ara-teknolojia matanjaka ny mpanjifa », hoy ny Tale jeneralin’ny Airtel Business Madagasikara, Randriamanana Santatra.
Hanamora ny fifandraisandavitra
Nanamafy ny tale jeneralin’ny Smmec fa safidy manan-danja amin’ny hoavy ity fanavaozana ny fiaraha-miasa ity. Ho an’ny Smmec, zava-dehibe ho azy ireo ny fahazoana ity fifandraisana tambajotra (flotte) miisa 800 ity. Hanamora ny fifandraisana amin’ny finday eo amin’ny mpiasa any ifotony amin’ireo masoivoho manerana ny Nosy izany, hanamora ny asa, sns.
Njaka A.
French