Nivoaka ny talata lasa teo ny didy mahakasika ny raharaha fandrobana mpandraharahara tao Vohitsara, ny 3 mey 2026 lasa teo. Lehilahy miisa telo no voampanga tamin’izany.
Voaheloka an-tranomaizina, sazy mihatra, Ramilinjaona Guillaume Laurent. Sazy mihantona ny an-dRazafindranjaona Tokiniaina ary nohafahan’ny fitsarana noho ny fisalasalana Ramilison Kevin Bryan. Fanaovana fikambanan-jiolahy sy fanimbana fananan’olona, fakana an-keriny volan’olona, fandrahonana olona amin’ny fitaovam-piadiana, fisandohana andraikitra sy asa ary fidirana an-keriny an-tokantranon’olona no vesatra anenjehan’ny fitsarana azy telo lahy ireo.
Tsiahivina fa notafihan’ny jiolahy miisa dimy ny mpandrahadraha iray tao Vohitsara, ny 3 mey 2026 lasa teo. Niditra an-keriny tao amin’io tokantrano io izy ireo ary nilaza hanao fisavana nefa tsy misy taratasy. Nitsambikina tamboho ary nodarohan’izy ireo ny vehivavy mpiasa an-trano. Nosavaina ny entana rehetra tao an-trano. Lasan’izy ireo, tamin’izany, ny fiara raitra miisa telo tao amin’ilay mpandrahadraha. Nisy nampandre ny mpitandro filaminana ny olona manodidina nandritra izany. Tonga ara-potoana ireto farany ka raikitra ny fifanenjehana. Tratra teo amin’ny sampanana “Plaque Relax” ny telo lahy sy fiara roa marika Toyota sequoia sy Dodge ram. Tafatsoaka niaraka tamin’ny fiara iray hafa ny roa lahy ambiny. Niakatra fitsarana ny raharaha tamin’ny 28 mey ary izao nivoaka ny talata lasa teo izao ny didy.
Sajo
French