Mpandraharaha amin’ny fifandraisan-davitra voalohany eto Madagasikara, mampiasa ny teknolojia Direct-to-Cell, ny Airtel Madagasikara. Miara-miasa amin’ny orinasa SpaceX. Zava-baovao ifandraisana amin’ny finday Smartphone 4G, amin’ny alalan’ny zana-bolana, raha sendra toerana mitoka-monina tsy misy tambajotra an-tanety, izy io. Ifandraisana amin’ny alalan’ny vidéo amin’ny Whatsapp.
Nahomby ny andrana natao tany amin’ny kaominina Sadabe, distrika Manjakandriana, ny 11 jolay teo. Fotoana natrehin’ny minisitry ny Fampiroboroboana ny niomerika, ny paositra ary ny fifandraisan-davitra (MDNPT), ny solontenan’ny Birao misahana ny loza voajanahary (BNGRC), ny Antokondraharaha mandrindra ny teknolojia sy ny fifandraisan-davitra (Artec) ary ny avy ao amin’ny Airtel sy ny SpaceX. Naseho mivantana ny fifandraisan-davitra, ny resaka sy ny sary, ary azo nampiasaina ny tambajotra Youtube sy ny Facebook.
Ilaina amin’ny fotoan-tsarotra
Sahaza tsara an’i Madagasikara ity teknolojia Direct-To-Cell ity satria mbola maro ny toerana mitoka-monina tsy ahitana tambajotra fifandraisan-davitra. Azo ampiasaina amin’ny lafiny maro, raha sendra fotoan-tsarotra na misy loza voajanahary, ny fifandraisana amin’ny tomponandraiki-panjakana, ny lafiny vonjy aina, sns. Nilaza ny tale jeneraly Airtel Madagasikara, Anne Catherine Tchokonté, fa « manova endrika ny tontolon’ny fifandraisan-davitra ny fisian’ity teknolojia ity, izay ho tombontsoan’ny Malagasy rehetra ».
Njaka A.
French