Feno ny fandaharam-potoan’ny filoham-panjakana, ny Kly Randrianirina Michaël, nandritra ny fiatrehany ny fihaonana an-tampon’ny SADC, ny herinandro teo.
Tafiditra ao anatin’ny dian’ny filohan’ny Fanavaozana, ny kolonely Randrianirina Michaël, tany Durban, ny fametrahana fehezam-boninkazo ho fahatsiarovana sy fanomezam-boninahitra ny filoha Olivier Reginald Tambo tao eThekwini, ao KawaZulu-Natal. Mpitondra ambony sy mpitantana ny ANC (African National Congress), anisan’ny niady mafy tamin’ny fanoherana ny fanavakavaham-bolonkoditra tao Afrika Atsimo, ity filoha ity. Anisan’ny nitondra anjara biriky lehibe izy ka nahatonga an’i Afrika Atsimo ho amin’ izao toerana misy azy izao. Nanamarika azy ny « A Nation in The Making », kabary malaza indrindra nataony ary maro ny toerana nomena ny anarany any Afrika Atsimo, ankehitriny, toy ny « O.R Tambo International Airport » any Johannesburg, seranam-piaramanidina lehibe indrindra eto Afrika. Anisan’ny nametraka ny fototra nahatonga an’i Mandela ho filoha voalohany mainty hoditra ihany koa i Olivier Reginald Tambo, tany amin’ny taona 1994.
Lalana Antananarivo – Toamasina
Etsy andaniny, nihaona tamin’ny filohan’ny Banky arabo ho an’ny fampandrosoana aty Afrika, Abdullah Kh. Almusaibeeh ny Filoham-panjakana, ny alahady teo.
Voaresaka ny momba ny tetikasa ho an’ny lalana mampitohy an’i Toamasina sy Maroantsetra. Eo koa ny ampahany amin’ny asa, ny “voie rapide” mampitohy an’Antananarivo sy ny Toamasina ary ny ampahany amin’ny RN1 Bis. Efa eo am-pandinihana koa ny tetikasa fanamboarana ny zotra an-dalamby FCE, mampitohy an’i Fianarantsoa sy i Manakara.
Mi.Raz
French