25 septambra 2025. Herintaona omaly ny hetsiky ny tanora Gen Z nisian’ny fiovam-pitondrana ho amin’ny fanavaozana. Ho tsiahy izany, nisy ny hetsika fitokanana tsangambato teny Ambohidahy, anisan’ny toerana mafy tamin’ny mpanao hetsika ny namaky azy, hidirana teny amin’ny Kianjan’ny 13 mey, Analakely. Famerenana ao an’eritreritra sy ao am-po ny ady sy ny tolona niarahana ny tsiahy ny tolona, araka ny lahatenin’ny tanora avy amin’ny Gen Z. Fahatsiarovana ireo namana rehetra nitolona, namoy ny ainy sy ireo latsa-dra rehetra nandritra ny tolona koa ny tsiahy, famelomana hatrany ny fitiavan-tanidrazana nolovaina tamin’ireo razana. Fanehoana hatrany koa ny fahavononana mbola hijoro ny tsiahy ny tolona hiady ho an’ny tanindrazana sy ny tanin-janaka. Mbola mitohy hatrany ny tolona, fa ny tamin’ny taon-dasa no vita.
Herintaona lasa izay no nisian’ny fifanenjehana teo amin’ny samy mpiray tanindrazana tamin’ny fomba feno habibiana, araka ny nambaran’ny tanora vavy iray mitondra takaitra noho izany. “Aoka izay ny fifanenjehan’ny samy Malagasy”, hoy izy. Koa andao hiaraka hanova… Nisy koa ny fampitana hafatra ho an’irao mpanao politika: maro ireo sasantsany tsy te hifampitankosina amin’ny tanora… Fomba ratsy mahazatra an-dry zareo no mbola tiany hampiainana. Tsy hozarazaraina amin’ny loko sy tombontsoa politika ny tanora. Tsy zakan’ireo olom-bitsy te hifehy an’i Madagasikara ny mahita ny firaisan-tsaina, indrindra eo amin’ny vahoaka. Fotoana izao anehoan’ny tanora fa mbola mijoro hatrany izy ireo.
Nisy ny fametrahana fehezam-boninkazo teo amin’ny tsangambato nataon’ireo olom-panjakana eo anivon’ny fitondrana Fanavaozana tonga nanome voninahitra ny hetsika tsiahy ny tolona.
R. Nd.
French