Mitohy ny fametrahana ny ratsa-mangaikan’ny Vovonana Tantana, any ifotony. Efa mipaka eny amin’ny kaominina sy fokontany izany ankehitriny.
Vononana iray, miady ho an’ny Fanavaozana tena izy ny Tantana, tarihin’ny filoha nasionaliny, Rakotoniaina Justin. Misandrahaka manerana ny Nosy izany, ankehitriny. Efa manana ny mpitarika azy ny isam-paritany. Efa mipetrapetraka ny eny anivon’ny distrika sy ny kaominina.
Anisan’ny efa lasa lavitra amin’ny fametrahana ny ratsa-mangaika ny ato anatin’ny faritanin’Antananarivo, tarihin’ny Ambasadaoro, Randrianarisoa Riana Raymonde.
Ity farany izay manao ny ainy tsy ho zavatra amin’ny fampiroboroboana ny maha olona sy ny fanabeazana ho olom-pirenena vanona. Ao anatin’ny fametrahana ny tambajotran’ny tanora mpitarika sy izay vonona ny hiady amin’ ny kolikoly izy ankehitriny, miaraka amin’ny mpiara-miasa aminy.
Efa anatin’ny fanomanana tanteraka ny Akademian’ny mpitarika ny ato amin’ny faritra Analamanga, tarihin-dRaharivololoniaina Ninah. Efa miparitaka any amin’ny boriborintany ny sampana eto an-dRenivohitra. Hatomboka eny anivon’ny kaominina ny fampiofanana ireo tanora na izay mpitarika afaka ny hitondra ny tenin’ny fikambanany, ny tanàny, sns. Misy ny fiaraha-miasa amin’ny Fikambanan’ny ben’ny Tanànan’ny Vovonana Tantana, amin’izany.
Ho any amin’ny faritra Bongolava, tarihin-dRazafimamonjy Noël, efa ben’ny Tanàna 20 mehery no niditra ho mpikambana. Miampy depiote iray nanolo-tena hifampitantana. Mahatratra 60 mahery ny fikambanana sy vondrona nanatitra ny antontan-taratasy, niditra ho mpikambana. Hotanterahina tsy ho ela ny hetsika hanamarihana ny fijoroana amin’ny fomba ofisialy.
Tsy ho ela ny fametrahana ny sampana ao Itasy sy Vakinankaratra, araka ny fanazavana nentin’ny Ambasadaoro, Randrianarisoa Riana Raymonde, hatrany.
r.r





